Ég veiti alhliða textaþjónustu fyrir stofnanir, fyrirtæki og einstaklinga og hef á mínum snærum teymi annarra sérfræðinga þegar á þarf að halda. Ég sérhæfi mig í prófarkalestri og málfarsráðgjöf auk þess sem ég annast textagerð og ritstjórn á prentuðu efni og vefsíðum, móta raddblæ (e. tone of voice), veiti ráðgjöf við samræmingu ólíkra texta og svo mætti áfram telja.
Í þeim tilvikum sem verkefni krefjast annarrar sérhæfingar kalla ég til viðeigandi verktaka úr hópi tengiliða minna, sé sjálfur um verkefnastjórnun og ber ábyrgð á verkinu. Þau sem ég vinn með eru til að mynda þýðendur, hugmynda- og textasmiðir, ritstjórar, umbrotsmenn og sérfræðingar í samfélagsmiðlum og leitarvélabestun. Þetta tengslanet gerir mér kleift að bjóða upp á umfangsmikla og heildstæða textaþjónustu þar sem viðskiptavinurinn þarf aðeins að vera í samskiptum við einn verkefnastjóra.
Einnig held ég hagnýt námskeið fyrir starfsmenn fyrirtækja, til dæmis um algengustu villur í rituðu máli, hvað sé best að gera til að skera úr um vafaatriði í texta og hvernig skrifa megi lýtalausan tölvupóst.